Thursday, May 5, 2016

PiliPinas 2016

Malapit na ang eleksyon sa Mayo anuwebe at kabi-kabilang mga patutsada ang lumalabas sa kabi-kabilang mga kampo. Nakakalungkot isipin na kailangan pang humantong sa batuhan ng putik ang mga kandidato. Ayokong isipin na ang mga ginagawang ito ay para hilahin pababa ang isang kandidatong nasa itaas. Ika nga nila, "Ang punong mabunga ay palaging binabato". Ngunit hindi ito maitatanggi ng sentido kumon ng kahit sinong Pilipino.

Noong si Vice President Binay pa ang nangunguna sa mga survey noong nakaraang taon, kaliwa't kanan ang banat ng ating Pangulong Noynoy sa kanya. Nang si Grace Poe naman ang umeksena at pumalit sa posisyon ni Vice President Binay bilang numero uno sa mga survey, walang tigil ang dating ng kaso laban sa kanyang kwestiyonableng pagkamamamayan. Umabot na sa taong kasalukuyan ang isyung ito hanggang sa naging pinal na ang desisyon ng Korte Suprema at ang karamihan at tumahimik na ng bahagya.

Dumating ang panahon ng kampanya noong Pebrero anuwebe at nagsimula nang magbago ang lahat. Unti-unti ay umangat ng umangat ang rating ni Mayor Duterte sa mga survey hanggang sa ito na ang nangunguna sa kalagitnaan ng init ng kampanya. Kahit anong survey ang lumabas ay siya pa rin ang nangunguna. Dahil dito, at sa inaasahan na rin ng lahat, kanya-kanyang banat at paninira na ng kanyang mga katunggali ang ibinabato sa kanya.

Ang mga ito ay hindi lang nangyayari sa radyo at telebisyon kundi pati na rin sa mga social media partikular na ang Facebook. Patuloy ang pagpapaskil ng mga artikulo laban sa isang kandidato na noon naman ay tahimik lamang na nangangampanya para sa kanilang sinusuportahang kandidato. Hindi po ako nagmamalinis dahil ako man ay minsan na ring nagpaskil ng mga ganitong bagay sa ilang kadahilanan ngunit sa katagalan ay binubura ko rin ang mga ito matapos pagnilayan kung tama ba ang ginawa kong iyon. Minsan na rin akong nagkumento sa mga post sa Facebook ng ilan sa aking mga kaibigan sa hindi mapigilang pagkadismaya. Ito ay lumalabas lang sa aking news feed kaya ako ay nagpalagay na ayos lang magkumento dahil alam naman ng lahat ng gumagamit ng Facebook na ang mga ipinapaskil dito ay lumalabas sa publiko o sa mga kaibigan niya dito.

Bago po tayo magpaskil ng kung ano-ano ay siguraduhin muna natin na ito ay totoo at hindi mga haka-haka lamang dahil marami po ang posibleng maging kahinatnan ng mga ito lalo na ang makapanakit ng damdamin ng iba. Atin din pong tiyakin na tayo mismo ay malinis mula loob hanggang labas bago tayo magsabi ng mga masasamang bagay tungkol sa mga kandidato. Tandaan, mga normal na tao lang din po sila tulad natin.

Naiintindihan ko na ang layunin ng ilan ay ipakita ang mga negatibo sa ilang kandidato nang sa gayon ay mas lalo pang makapamili ng wasto ang mga botante. Ngunit dapat din nating tandaan na walang perpektong tao at sa tingin ko ay mas maganda kung ang pagbabalingan natin ng natin ay ang mga magagandang layunin ng mga kandidato para sa bansa.

Kasama ng aking pagrespeto sa kalayaan ng sinuman na magpahayag ng kanilang gusto o saloobin sa kahit anong uri ng social media platform, narito po ang aking ilang mga katanungan:

Hindi po ba ang panahon ng kampanya ay pagpapakita ng plataporma ng mga kandidato para sa ikagiginhawa ng buhay nating mga Pilipino?

Bakit ngayon ang kampanya ay tila baga panahon ng hilahan ng mga taong nasa itaas?

Ganito na po ba tayo kadesperado para lang mailuklok ang ating sinusuportahang kandidato?

Bakit hindi na lang natin pagsikapan na iangat ang sarili nating kandidato sa pamamagitan ng pagpapaskil ng mga magagandang bagay tungkol sa kanila?

Malapit nang dumating ang araw ng eleksyon. Medyo huli na kung titingnan ang mga pahayag na ito ngunit ito naman ay naaayon lamang sa panahon. Pero ako ay naniniwala na hindi pa huli ang lahat para sa ating bansa. Ang ikauunlad ng ating Inang Bayan ay nakasalalay mismo sa ating mga kamay ngunit ating tandaan na napakalaki ang gagampanan ng isang lider para dito.

Nawa'y maliwanagan tayong lahat at bigyang gabay ng ating Poong Maykapal sa tamang pagpili ng ating magiging lider sa susunod na tatlo at anim na taon.